‘जातीय भेदभाव तथा छुवाछूत उन्मूलन दिवस’को अवसरमा माननीय प्रदेश प्रमुख गोविन्दप्रसाद कलौनीज्यूबाट व्यक्त शुभकामना सन्देश
जातीय भेदभाव तथा छुवाछूत उन्मूलन दिवसको अवसरमा कर्णाली प्रदेशवासी तथा सम्पूर्ण नेपाली दाजुभाइ दिदीबहिनीहरूमा सुस्वास्थ्य र दीर्घायु एवम् उत्तरोत्तर प्रगतिका लागि शुभकामना व्यक्त गर्दछु ।
वि.सं. २०६३ साल जेठ २१ गते नेपाल सरकारले जातीय छुवाछूत मुक्त राष्ट्र घोषणा गरेको उपलक्ष्यमा हरेक वर्ष जेठ २१ गतेलाई जातीय भेदभाव तथा छुवाछूत उन्मूलन दिवसका रूपमा मनाउने गरिएको छ । विविध जातजाति र धर्म संस्कृति बीचको एकता नै हाम्रो समाजको विशेषता हो । नेपालमा जातीय छुवाछूत, उत्पीडन र विभेदको अन्त्य गर्न राष्ट्रिय दलित आयोगलाई संवैधानिक अङ्गको मान्यता दिइएको छ र राज्यका सबै निकायमा समानुपातिक समावेशी सिद्धान्तको आधारमा सहभागिता हुने कुरा संविधानको मौलिक हकले सुनिश्चित गरेको छ । यसै गरी जातीय तथा अन्य छुवाछूत र भेदभाव (कसूर र सजाय) ऐन २०६८ (संशोधन) २०७५ र जातीय भेदभाव तथा छुवाछूत (कसुर र सजाय) नियमावली, २०७४ जस्ता कानुनहरू निर्माण भई कार्यान्वयनमा रहेका छन्, जसमा कसुरदारलाई कैद र जरिबानाको समेत व्यवस्था गरिएको छ । यसबाट दलित समुदाय माथि भएका विभेद र उत्पीडन क्रमशः अन्त्य हुने आधार निर्माण हुँदै गएको महसुस गरेको छु । यस दिवसले जातीय भेदभाव तथा छुवाछूत रहित समाज निर्माण गर्ने प्रेरणा दिने विश्वास गरेको छु ।
अन्तमा, जातीय भेदभाव, छुवाछूत र सबै किसिमका विभेदकारी कुप्रथाको अन्त्य गर्ने काममा सबै जातजाति, धर्म संस्कृतिका नागरिक तथा सरोकारवाला सबैलाई सक्रिय भएर लाग्न आह्वान गर्दै पुनः यस दिवसको अवसरमा शुभकामना व्यक्त गर्दछु ।
धन्यवाद !
मिति २०७८ जेठ २१ गते, शुक्रवार ।
गोविन्दप्रसाद कलौनी
प्रदेश प्रमुख
कर्णाली प्रदेश